Despois de dous anos sen se celebrar, o festival irmandiño da Costa da Morte volve á loita sen perder a súa esencia asociativa. Antes do confinamento de marzo de 2020, a organización xa estaba plenamente inmersa na celebración do 25 aniversario e tiña anunciado dous grupos para o gran cartel musical desta efeméride. Unha vez recuperados, decidiuse recuperar a forza dese cartel e apostar por consolidar e non deixar pasar a oportunidade de desfrutar de Sés e Talco no campo da festa da Torre.

Talco

En pouco máis de quince anos desde a súa creación e con sete álbums publicados, a italiana xa é unha das bandas de ska máis importantes da escena en Europa. Talco xurde en Marghera, Venecia, como un grupo ska e punk, que logo vai conseguir éxito en todo o país e fóra das súas fronteiras. O seu son é contundente, con moita enerxía no escenario, característicos polos seus ventos e que por veces lembra á música de circo e folk italianos. As súas letras cunha forte mensaxe política xa resoaron en festivais de primeira categoría da península Ibérica, Francia, Alemaña, Países Baixos…

Sés

Presentará o seu último traballo discográfico Liberar as arterias co que segue evolucionando o seu particular son que a consagrou no máis alto, e no que se inclúen unha escolma de cancións con letra e música composta pola propia cantora. Un sétimo disco que mantén e potencia a súa valente mensaxe, e no que percorre América de norte a sur, todo filtrado pola súa alma de cantareira.

SÉS vén de se converter nunha das artistas de maior éxito na Galiza polo seu carisma e discurso así como pola forza e calidade das súas cancións, que a levaron a actuar en festivais e teatros de toda a península Ibérica e neste ano mesmo a percorrer a América que tanto a inspira.

Retomar o asociacionismo trala pandemia

O Asalto ao Castelo de Vimianzo celebrou este pasado sábado unha exitosa reunión aberta á veciñanza, na que se conseguiu convocar a unha trintena de persoas. Nesta xuntanza deuse mostra do apoio social á celebración despois da paralización provocada polos efectos da crise sanitaria.

Nas dúas horas de convocatoria falouse das necesidades e novidades que traerá esta 25 edición e as tarefas que vai desenvolver cada persoa. Grazas ao traballo de persoas voluntarias e do Concello de Vimianzo conseguirase consolidar actividades de referencia na festa e potenciar eventos como a Cea Medieval, a ornamentación e ambientación de rúas, a Legua irmandiña e o programa musical. Para o mes de maio está prevista a celebración dun casting para comezar cos ensaios da peza teatral, que este ano dirixirá Guillermo Méndez.